Psa 64 | MMX | STEP | Nia na a nemen keneng at lumumuat; Moroa una ronga lising tarak! Nia a marat at limixin munepen minia, una lox asepsu ia basinge di.

Psalms 64

Lisingising Ti Loklok Aratao

1 Nia na a nemen keneng at lumumuat; Moroa una ronga lising tarak! Nia a marat at limixin munepen minia, una lox asepsu ia basinge di. 2 Una rupe ia at lenngitngit at limixin kakapmek, basinge bok nedi buaang limixin kakapmek.

3 Levelinga atnedi ip sep ngan ta lemparise sepsep ing sengsen, la levelinga xakapmek atnedi ik sixit mokmokso ngan levesoosoo. 4 Kopmen di marat kusu dina paase palas asu soso laxalinga xaxarang atnedi, dik lok kapmek tinotno lorooro at limixin avukat mi levelinga xaxarang la dik lox askosko limixin.

5 Nedi xa di epang aru kusu dina lok laxakapmek; di epaase do dinaba li lara pelixo atnedi ua. La di tong i do, “Kopmen tara naba ven dik.” 6 Di seput li leventaangas kakapmek la di tong i do, “Dik tara gagas li vam langas i nunuan aleng.” Lebelen mi lodoxoma at limixin kerepmo ing tangku axap.

7 Ketla ne Moroa naba soosoo di mi levesoosoo ren, la soso mun dinaba ruuna ka levenin kooxing. 8 Ni naba sele utut kepe di mumu mo levelinga xapmek atdi; la limixin petpes diba ven di, diba piripat lempatlak atnedi.

9 La nedi axap dinaba marat, atla dinaba domasu at levempanga ne Moroa ga lox i, la dinaba tong asu mo leveloklok aleeng teren. 10 Nedi axap limixin mokmokso dinaba momo ap mo levempanga Leeme Silok ga lox i. Dinaba nemen matmatkun maxopok at loklok tatao ren; limixin axap di nunuan, dinaba emi asu min.